កិច្ចប្រជុំស្តីពីការតម្រង់ទិសលើការគាំទ្រការអនុវត្តក្របខណ្ឌអប់រំស្ទែមកម្រិតសាលារៀន
សេចក្ដីជូនដំណឹង · 14 កញ្ញា 2026
នាព្រឹកថ្ងៃចន្ទ ទី១៤ ខែកញ្ញា ឆ្នាំ២០២៦ គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) ក្រោមការសម្របសម្រួលរបស់នាយកដ្ឋានមធ្យមសិក្សាចំណេះទូទៅ នៃក្រសួងអប់រំ យុវជន និងកីឡា បានរៀបចំ «កិច្ចប្រជុំស្តីពីការតម្រង់ទិសលើការគាំទ្រការអនុវត្តក្របខណ្ឌអប់រំស្ទែម (STEM) កម្រិតសាលារៀន នៅឆ្នាំ២០២៧» ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត អ៊ុម រម្យណី រដ្ឋលេខាធិការនៃក្រសួងអប់រំ យុវជន និងកីឡា និងជានាយកគម្រោង SE4HC។ ដោយមានការចូលរួមពីក្រុមការងារបច្ចេកទេស ក្រុមការងារថ្នាក់ជាតិ គ្រូបង្គោលស្ទែមថ្នាក់ជាតិ មន្ទីរអប់រំ យុវជន និងកីឡា រាជធានីខេត្ត ២៥ សាលារៀនគោលដៅ ២៥៩។
កិច្ចប្រជុំនេះបានប្រព្រឹត្តទៅដោយផ្ទាល់នៅបន្ទប់ប្រជុំ គម្រោង STEP UP (ជាន់ទី៦ អគាររដ្ឋបាលនៃក្រសួងអប់រំ យុវជន និងកីឡា ចៅពញ្ញាហុក) និងតាមប្រព័ន្ធអនឡាញ Zoom។
🎯 គោលបំណងសំខាន់ៗនៃកិច្ចប្រជុំ៖ (១) បង្ហាញអំពីទិដ្ឋភាពទូទៅនៃគោលនយោបាយលើកកម្ពស់ការអប់រំស្ទែមនៅកម្រិតសាលារៀនរបស់ក្រសួង អប់រំ យុវជន និងកីឡា និងក្របខណ្ឌគម្រោង SE4HC (២) បង្ហាញអំពីឯកសារទស្សនទាននៃការគាំទ្រការអនុវត្តក្របខណ្ឌអប់រំស្ទែម កម្រិតសាលារៀន (៣) បង្ហាញអំពីលក្ខណៈនៃការជ្រើសរើស និងតួនាទីភារកិច្ចរបស់ STEM Animator នៅកម្រិតសាលារៀន (៤) បង្ហាញអំពីផែនការ និងឧបករណ៍ការវាយតម្លៃដើមគ្រា និងវាយតម្លៃប្រចាំឆ្នាំក្នុងការកំណត់សាលារៀន សម្រេចបានលើការអនុវត្តក្របខណ្ឌស្ទែម កម្រិតសាលារៀន។
គួរបញ្ជាក់ផងដែរថា SE4HC នឹងផ្តល់ការគាំទ្រសាលារៀនគោលដៅទាំង ២៥៩ ក្នុងការអនុវត្ត SBSF។ តាមរយៈសកម្មភាពនៃការគាំទ្រការអនុវត្តក្របខណ្ឌនេះ គម្រោងនឹងផ្តល់វគ្គបំប៉នសមត្ថភាពដល់មន្ទីរអយក. សាលារៀន និងគ្រូបង្រៀនស្ទែម ផ្តល់ការគាំទ្រនៅកម្រិតសាលារៀនតាមរយៈការសម្របសម្រួលរបស់គ្រូប្រឹក្សាគរុកោល្យនៅកម្រិតសាលារៀន (School Based Mentor), សកម្មភាពទស្សនកិច្ចសិក្សាផ្លាស់ប្តូរបទពិសោធន៍រវាងសាលារៀនគោលដៅ កម្មវិធីពិព័រណ៍ស្នាដៃស្ទែមរបស់សិស្សានុសិស្ស និងការផ្តល់ការទទួលស្គាល់សាលារៀនសម្រេចបានលើការអនុវត្តក្របខណ្ឌប្រចាំឆ្នាំ។ ជាលទ្ធផល តាមរយៈការគាំទ្រសម្មភាពទាំងនេះ សាលារៀនគោលដៅ ចំនួន ១២០ យ៉ាងតិច សម្រេចបានកម្រិត ២ ឬលើស និង គ្រូបង្រៀនចំនួន ២១០រូប នឹងប្រែក្លាយជាគ្រូបង្រៀនឆ្នើម និងទទួលបានពានរង្វាន់ផ្នែកស្ទែម។
#ក្រសួងអប់រំយុវជននិងកីឡា #MoEYS #អបរំស្ទែម #STEMeducation #SE4HC